Membros

×

Carmen Franco Vázquez

Doutora en Belas Artes pola Universidade de Vigo, licenciada en Belas Artes na Universitat Politécnica de Valencia e en Xeografía e Hª, especialidade de Historia do Arte, pola USC. É profesora Titular na Universidade de Santiago de Compostela (USC) na área de Didáctica da Expresión Plástica. Imparte docencia de Educación Artística nos graos de Mestre na Facultade de Ciencias da Educación. É coordinadora do grupo de investigación LITER21 e investigadora do Instituto de Ciencias da Educación da USC. Pertence a distintas asociacións como: Sociedad para la Educación Artística(SEA), Rede Ibero Americana de Educação Artística (RIAEA), Grupo de Intervención Artística C3, Rede temática de investigación Las Literaturas Infantiles y Juveniles del Marco Ibérico e Iberoamericano (LIJMI) y al ICOM (International Council of Museums). Autora de artigos sobre Educación Artística, perspectiva de xénero e ilustración en Literatura Infantil e Xuvenil.

×

Carol Gillanders

Desde o ano 2000 traballa na Facultade de Ciencias da Educación da Universidade de Santiago de Compostela. Terminou os seus estudos de música en Arxentina en 1991, completando a súa formación en linguaxe musical e canto en España. Posúe o Diploma Pedagóxico de Educación Musical Willems e é Monitora de Musicoterapia. No ano 2011 leu a súa tese doutoral titulada “Os medios na práctica docente do especialista en educación musical en Galicia” na USC, que obtivo premio extraordinario. A súa traxectoria investigadora está vinculada á Educación Musical e aos proxectos artísticos interdisciplinares. É membro da recente creada Asociación de Profesorado de Educación Musical (AUDIEMUS)

×

José Agustín Candisano Mera

Nado en 1968 en Arxentina, rematou os seus estudos de Piano no Conservatorio de Música de Barcelona (España) onde se graduou como Profesor de Piano, estudando tamén Música de Cámara e Solfexo. A súa profesora de Piano foi a Sra. Carmen Undebarrena. En Arxentina, estudou previamente co Mestre Antonio Russo e Ana María Floriani, Raquel Zone, Susana Bonora e Perla Fortunatti. Así mesmo, asistiu a diferentes cursos con Violeta Hemsy de Gainza e rematou os seus estudos de Formación Musical Willems e Musicoterapia. A súa tese doutoral está relacionada coa Educación Somática. Para completar a súa formación, estudou canto e clavicémbalo. Deu numerosos concertos como solista e como membro dun grupo de cámara. Tocou coa Orquestra Sinfónica de Bahía Blanca, a Orquestra de Cámara do Garraf e a Orquestra Clásica dos Amigos. Actualmente é profesor no Conservatorio Superior de Música de Vigo, onde se especializa como pianista acompañante.

×

Carme López Fernánez

Intérprete, docente e investigadora do campo da música de tradición oral galega. Graduada en Mestra de Educación Primaria con mención en música (USC), titulada superior de Interpretación na especialidade de Instrumentos da Música Tradicional e Popular de Galicia (CSM de Vigo), Máster en interpretación e investigación musical (VIU) é doutora pola UDC coa tese “Compilación, análise e uso didáctico do repertorio vocal acompañado de percusión de man como parte do patrimonio inmaterial galego. Estudo dun caso representativo”, que toma como base o repertorio vocal acompañado de percusión de man de Liñares (Avión – Ourense). Na súa labor investigadora a súa liña principal diríxese ás músicas de tradición oral e a súa relación coa etnomusicoloxía, a perspectiva de xénero e a educación.

×

Olalla Cortizas Varela

Licenciada e doutora en Belas Artes pola Universidade de Vigo. A súa carreira investigadora comeza en 2008 dentro do Grupo de investigación MODO (Modos do coñecemento artístico), na Facultade de Belas Artes de Pontevedra, cunha bolsa de Terceiro Ciclo da Xunta de Galicia e continúa cun contrato predoutoral da Xunta de Galicia. Entre os anos 2008-2015 traballou como artista e investigadora dentro do mesmo grupo de investigación, impartindo tamén docencia dentro do Grao de Belas Artes. Defendeu a súa tese doutoral sobre o ensino da escultura no marco universitario en decembro de 2015 e actualmente forma parte do persoal docente da Facultade de Ciencias da Educación como contratada doutora da área de Didáctica da Expresión Plástica nos Graos de Mestre/a de Educación Infantil e Primaria. Desde 2015 pertence ao grupo Liter21 (GI-1839. Literatura galega. Literatura Infantil e Xuvenil. Investigacións Literarias, artísticas interculturais e educativas. Lecturas) da Universidade de Santiago de Compostela. As súas liñas de investigación vincúlanse á educación e á arte contemporánea nos espazos fronteirizos da interdisciplinariedade, atopando na LIJ (Literatura Infantil e Xuvenil) un dos campos específicos onde conflúen as súas investigacións dos últimos anos, cun interese especial nas potencialidades creativas e educativas da materialidade e do visual no libro infantil. Participou en Congresos e publicou artigos, capítulos de libros e recensións sobre Literatura Infantil e Xuvenil Galega.

×

Rocío García Pedreira

Doutora en Estudos da Infancia, especialidade de Infancia, Cultura e Sociedade – Literatura para a Infancia (Universidade do Minho). Posúe o Grao en Educación Primaria (Universidade da Coruña) e un Mestrado sobre Investigación Literaria e Teatral (Universidade de Alcalá de Henares). Na actualidade é docente na área de Didáctica da Lingua e da Literatura na Universidade de Santiago de Compostela. A súa actividade investigadora céntrase no estudo da Literatura Infantil e Xuvenil e a súa vinculación con outras artes, especialmente a ilustración, o cine e a novela gráfica, para a optimización do seu tratamento didáctico mediante metodoloxías innovadoras e propostas interdisciplinarias. Conta con diversas publicacións en revistas indexadas e libros publicados por editoriais de prestixio. Tamén participou en diversos congresos internacionais vinculados coa súa área e outras afíns.

×

Marta Neira Rodríguez

Licenciada en Filoloxía Galega e doutora en Filoloxía Galega pola Universidade de Santiago de Compostela cunha tese sobre Literatura Infantil e Xuvenil. Profesora na Facultade de Ciencias da Educación da Universidade de Santiago de Compostela na área de Didáctica da Lingua e a Literatura. Secretaria da Rede Temática de Investigación “As Literaturas Infantís e Xuvenís do Marco Ibérico e Iberoamericano” (LIXMI). Forma parte do Persoal Científico do ICE, é membro do Grupo de Investigación LITER21 (GI-1839) da USC. Coordina os proxectos “Informes de Literatura” e “Investigación en Literatura Infantil e Xuvenil” do Centro Ramón Piñeiro para a Investigación en Humanidades. Autora de monografías, artigos e recensións sobre Literatura e Literatura Infantil e Xuvenil Galega. Entre estas publicacións atópase a súa participación na Historia da Literatura Infantil e Xuvenil Galega, coordinada por Blanca Roig.

loader